Aug 3, 2015

പുതുവര്‍ഷം - കവിതാലാപനം



മലയാളം പാഠപുസ്തകത്തില്‍ ഉള്‍പ്പെടുത്തിയ കവിതകളുടെ ആലാപനം നാം ഏറെ ആഗ്രഹിച്ച ഒന്നാണ്. അതിനു സാധ്യതയൊരുക്കുകയാണ് വിദ്യാരംഗം ബ്ലോഗ്. ആദ്യമായി ഉള്‍പ്പെടുത്തുന്നത് എട്ടാം ക്ലാസ്സിലെ പുതുവര്‍ഷം എന്ന കവിതയാണ്. ഈ കവിത ആലപിച്ച് ബ്ലോഗിന് അയച്ചു തന്നത് ശ്രീ.മനോജ് മാഷാണ്. പാഠപുസ്തക സമിതിയംഗവും മലയാളത്തിന്റെ സംസ്ഥാന റിസോഴ്സ് ഗ്രൂപ്പ് അംഗവുമാണ് ശ്രീ.മനോജ് പുളിമാത്ത്. വരും നാളുകളില്‍ മൂന്നു മുതല്‍ എട്ടു വരെ ക്ലാസ്സുകളിലെ കവിതാലാപനം ബ്ലോഗില്‍ നിന്നും ഏവര്‍ക്കും പ്രതീക്ഷിക്കാവുന്നതാണ്.


www.schoolvidyarangam.blogspot.com 

Jul 28, 2015

ഗ്രാന്മ (കഥ)



ജൂലൈ മാസത്തിലെ അധ്യാപക പരിശീലനത്തോടനുബന്ധിച്ച് 'അമ്മമ്മ' എന്ന പാഠചര്‍ച്ചയെ മുന്‍നിര്‍ത്തി തയ്യാറാക്കിയ ഒരു ചെറുകഥ ബ്ലോഗിനയച്ചു തന്നത് ചുവടെ പ്രസിദ്ധീകരിക്കുന്നു. നമ്മുടെ അധ്യാപക പരിശീലനങ്ങള്‍ ഇത്തരത്തില്‍ സജീവമാകട്ടെ എന്നാശംസിക്കുന്നു...............

ഗ്രാന്മ




ഗേറ്റ് കടന്ന് കാറ് മെല്ലെ മുറ്റത്തേക്കു കയറി.

ഇന്റര്‍ലോക്ക് വിരിപ്പില്‍ ടയറുകള്‍ അമര്‍ന്നു.

.സി.യുടെ ശബ്ദം താഴ്‌ന്നു. ഗ്രാന്മ പോര്‍ച്ചിലേക്ക് പെട്ടെന്നിറങ്ങി. പുറത്ത് വെയില്‍ച്ചൂട്.

ഉമ്മറത്തുകയറി കുഷ്യന്‍വിരിച്ച കസേരയിലേക്ക് അസ്വസ്ഥതയോടെ ഗ്രാന്മ ഇരുന്നു.

"മോളേ...” ആ ശബ്ദം വിറയാര്‍ന്നു.

അകത്തുനിന്നും ശെല്‍വി വിളികേട്ടു.

അല്പം കഴിഞ്ഞ് ഗ്രാന്മയുടെ സഹായിയായ ആ പെണ്‍കുട്ടി വെള്ളം നിറച്ച ഗ്ലാസ്സുമായി ഉമ്മറത്തു പ്രത്യക്ഷപ്പെട്ടു.

കാറിന്റെ ഡോര്‍ തുറന്നടഞ്ഞു... വലിയ ടെഡി ബിയറിനെ കെട്ടിപ്പിടിച്ച് അനുമോള്‍ അകത്തേക്ക് ഓടിപ്പോയി. മകള്‍ ഷോപ്പിംഗ് സഞ്ചിയുമായി അകത്തേക്കുപോയി..

ഗ്രാന്മ തൊടിയിലേക്കു നോക്കി. മുത്തച്ഛനെ അടക്കം ചെയ്ത മണ്ണ്..‌.

അടുത്ത കാറും വന്നുനിന്നു. മകനും ഭാര്യയും ഇറങ്ങി.

Jul 23, 2015

ഭാവാത്മക വായന - അമ്മമ്മ

ഭാവാത്മക വായന

  ഭാവം ഉള്‍ക്കൊണ്ട് സാഹിത്യരചനകള്‍ വായിച്ചാസ്വദിക്കുന്നതിന് കുട്ടികളെ തയ്യാറാക്കല്‍ ​അവധിക്കാല പരിശീലനത്തില്‍ നാം പരിചയപ്പെട്ടതാണ്. എന്നാല്‍, അമ്മമ്മ എന്ന രചനയുടെ ശബ്ദരേഖ നമ്മില്‍ പലരുടെയും കയ്യില്‍ ലഭ്യമല്ലാത്തതിനാല്‍ ക്ലാസ്സ് മുറിയിലെ പ്രവര്‍ത്തനത്തിന് സഹായകരമായ ആ ശബ്ദശകലം ചുവടെ നല്‍കുന്നു. ഏവര്‍ക്കും വ്യത്യസ്തമായ ഒരു വായനാനുഭവം ഉണ്ടാകട്ടെ എന്നാശംസിക്കുന്നു.


 


വിദ്യാരംഗം ബ്ലോഗ് ടീം

Jul 7, 2015

നാരങ്ങ



നാരങ്ങ

മഞ്ഞയെ പകര്‍ത്തി ഞാന്‍
നിന്‍ മുഖം തുടുപ്പിച്ചു.

ആ മുഖം മിനുങ്ങുന്ന രഹസ്യം
എന്നില്‍ത്തന്നെ-
യൊളുപ്പിച്ചിതേവരെ,
പറഞ്ഞില്ലാരോടും ഞാന്‍.

ഒരുനാള്‍
ദാഹം മാറ്റാന്‍
ചിണുങ്ങി നില്‍ക്കും നിന്നില്‍
പിഴിഞ്ഞുതന്നൂ ഞാനെന്‍
ഹൃദയം രഹസ്യമായ്.

തണുപ്പിനുള്ളില്‍ നിന്നെ
കളിപ്പിച്ചെല്ലാം ചെയ്തൊരാ -
ലസ്യ നിമിഷത്തെ
ഒളിപ്പിച്ചിതേ വരെ.

വിളമ്പില്‍ രണ്ടാമതായ്
പച്ചിലപ്പുറത്തെന്റെ -
കരളില്‍ കണ്ണും നട്ട്
ഓണമുണ്ണുമ്പോള്‍
നിന്റെ ചുവന്ന ചുണ്ടില്‍
ഒരു കൊതി ഞാനെറിഞ്ഞിട്ടു.

തൊട്ടു നീ നാവില്‍ വച്ചു
പറഞ്ഞു, ഹാ
എന്തൊരു കയ്പാണയ്യ

 - വിനോദ് വൈശാഖി

Jun 29, 2015

പ്രേമം .... തലയ്ക്കു പിടിച്ച പ്രേമം - സിനിമാനിരൂപണം




മുടിഞ്ഞ പ്രേമം എന്നൊക്കെ പറഞ്ഞു കേട്ടിട്ടേയുള്ളൂ, ഇക്കഴിഞ്ഞ ദിവസങ്ങളിലാണ് ഇത് ഇത്ര ഭീകരമായിരിക്കുമെന്ന് മനസ്സിലായത്.... ശരിക്കും അനുഭവിക്കുന്നവർക്കല്ലേ ഇങ്ങനെ പറയാനാകൂ. കപട സദാചാരന്മാരുടെ അടികൊള്ളും മുമ്പ് കാര്യം പറഞ്ഞേക്കാം, പുതിയ മലയാളം ഹിറ്റ് പ്രേമം സിനിമയുടെ കാര്യമാണ് പറഞ്ഞു വന്നത്. എന്താ തിരക്ക്, ഓടുന്ന തീയേറ്ററെല്ലാം നിറഞ്ഞ് കവിഞ്ഞ് റോഡും ബ്ലോക്കായി അങ്ങനെ പ്രേമം കരകവിഞ്ഞൊഴുകുന്നു. നീന്തിത്തുടിച്ച് നമ്മുടെ യുവതലമുറയും..... കണ്ടവർ കണ്ടവർ വീണ്ടും കാണുന്നതു കൊണ്ട് കാണാനാകാത്തവർക്ക് പ്രേമം അനുഭവിക്കാനാകാതെ വരുന്നതിന്റെ നിരാശ പ്രേമിച്ചവർക്കെങ്കിലും മനസ്സിലാവണ്ടതല്ലെ ... വഴിമാറികൊടുക്കാനുള്ള മര്യാദ നമ്മൾ മലയാളികൾ പണ്ടേ കാണിക്കാറില്ലല്ലൊ !